Beste [FNAME]
Baie welkom by die eerste uitgawe van 2022 se nuusbrief! Alhoewel die eerste maand ook al op sy rug lê, wil ek steeds vir jou ’n goeie jaar toewens – vol goeie geleenthede en aangename ervarings!
Gelukwense aan twee van ons spanlede: Sue se van is nou Pyler-Slabbert want sy is sedert 21 Desember ’n Mevrou. Kyk na haar mooi troufoto's! Fritz en Marlene Klaaste het ‘n baie groot kersgeskenk gekry met die geboorte van hul derde kleinkind Kenya op Oukersdag – mag die kleinding vir julle baie vreugde en geluk bring en julle op julle tone hou!
Al die luisteraars is ook natuurlik verheug om Nic de Jager se stem weer op lug te hoor. Lees meer oor sy groot skrik.
Op Sondag 6 Februarie vier ons die 50ste verjaarsdag van Loof die Here met ‘n spesiale program saamgestel en aangebied deur Magdaleen Krüger.
Die luisteraars in die Kleinmond omgewing in die Wes-Kaap sukkel die afgelope paar maande met radio ontvangs agv gereelde diefstal en plundery van die sender, en telkens maak Sentech dit reg. Ongelukkig is dit vroeg in Januarie onherstelbaar vernietig en herbou moet word. Die gemeenskap, raadslede en Sentech is nou in gesprek om te kyk na ‘n alternatiewe ligging vir ‘n nuwe toring, maar dit behels ‘n omslagtige proses wat ICASA en radiostasies betrek, en boonop finansiële implikasies het. Dit gaan dus nie net ‘n week of selfs ‘n maand neem om te herstel nie. Intussen kan luisteraars na RSG luister deur die oudiokanale van DSTV 813 of Openview 615, aanlynluister by rsg.co.za of deur die SABC Nuus se toepassing op ‘n slimfoon af te laai.
Ons het steeds vakante poste vir ‘n Bemarkingsbestuurder, Digitale Spesialis, Digitale Assistent en Musiekopsteller. Party hiervan sal dalk deur spesialiswerwing moet geskied. Intussen help of vryskutpersone of ander personeel ons intussen uit.
Ons is ook tans besig met beplanning van programme en aanpassings vir die nuwe finansiële jaar, begrotings, administrasie, vryskutkontrakte, papierwerk – daar word gewoel en gewerkskaf tot laat in die aande!
Geniet die res van die somermaande – ons gesels weer binnekort.
Groete,
Louise en die RSG-span