Beste [FNAME]
Dit word darem nie meer so vroeg donker in die aande nie, en die koeler weer het begin wyk – wat beteken Lente is hier! Ek is baie bly oor die nuwe seisoen wat aangebreek het, want dit beteken ook ons kan begin uitsien na ’n paar nuwe radio-reekse wat voorlê, asook die tweede radioteaterseisoen wat op 7 Oktober afskop.
Ons het vanjaar 162 inskrywings in die RSG/Sanlam Radiodramaskryfkompetisie ontvang! Die tekste word tans beoordeel.
Ek wil graag goeie nuus met julle deel. Die afgelope vier maande het RSG se inkomsteteiken positiewe groei getoon, sowel as die jaar-op-jaar groeisyfers vergeleke met laasjaar. Baie mense en maatskappye is deur ’n moeilike tyd sedert die Covid pandemie begin het en dit het ook vir RSG beïnvloed, maar ons kan nou begin vorentoe kyk.
Ek wil ook elke luisteraar bedank vir jul lojaliteit – dat julle steeds inskakel, vir die positiewe en bemoedigende boodskappe aan die omroepers in die ateljee (ons kyk maar verby dié wat skel) en dat julle steeds RSG kies as julle eerste keuse radiostasie. ’n Mens sal nooit almal tevrede kan stel nie, maar ons poog om soveel as moontlik mense te vermaak, in te lig en op te voed deur RSG se wye verskeidenheid programme en musiek.
Ons maak ook vordering met die vakante poste by RSG. Jaco Wagener is aangestel as die Oudiovisuele Regisseur wat verantwoordelik is vir al die tegniese aspekte om die stasie op lug te hou. Welkom Jaco!
Op 1 Oktober begin die Senior Kontinuïteitsregisseur wat onder andere sal fokus op nuwe programidees, kwaliteitbeheer, spesiale produksies asook buite- uitsendings. Daar is nog drie poste wat gevul moet word, en ek vertrou dat ons ook binnekort daardie aanstellings kan vier.
Die afgelope paar maande het RSG hande gevat met projekte soos Winterhoop, Beeld Kinderfonds, Orgaanskenking en ons doel is om sodoende ook uit te reik na verskeie gemeenskappe, en hul behoeftes te belig. Ons luisteraars bewys telkens hul omgee geaardheid en ruim harte, en ek sê dankie vir elkeen se betrokkenheid en ondersteuning. Daar is nog baie instansies wat hulp benodig, en ek wens ons kon elkeen help – maar jy kan ook ’n verskil maak in jou onmiddellike omgewing waar jy woon en werk – en sodoende kan elkeen se klein bydra op die ou einde ’n groot verskil maak!
Mooi bly tot volgende keer!
Groete,
Louise en die RSG-span
