Beste [FNAME]
Dis darem nog vroeg in 2023, daarom wil ek in ons eerste nuusbrief van die jaar vir jou ‘n goeie en gesonde 2023 toewens!
Die begin van ‘n nuwe kalenderjaar beteken vir ons die laaste kwartaal van ‘n finansiële jaar. Dit is die tyd wat strategieë en begrotings gefinaliseer word vir aktivering op 1 April. Alles saam beteken baie vergaderings, beplanning en administrasie. Dit is dus doller as kop-af hier by jou stasie.
Maar tussendeur maak ons span nuwe programme. Jy sal na ons nuwe dokumentêre seisoen op Donderdagaande om agtuur moet luister om uit te vind waar pas ‘n dam, Worsie, afwesige pa's, Sokrates en Rammstein in.
Luister ook na twee nuwe reekse wat luisteraars op Sondae kan geniet: Die klassieke musiekreeks Storie deur harmonie word om 10:00 deur Tharien Oosthuizen aangebied en in Wat het jy in jou hand om 19:00 gesels Lizelle de Bruin met mense wat baie met min doen, en die wêreld ‘n beter plek maak.
Ondanks beurtkrag-uitdagings gaan RSG voort met daaglikse uitsendings, maar die landswye sendernetwerk is onder hewige druk weens beurtkrag en faktore soos karige instandhouding en vandalisme. Gesprekke met Sentech, wat die seinverspreiding vir alle radiostasies in Suid-Afrika doen, word op die hoogste vlak gevoer.
Luister intussen gerus na die gesprek wat RSG se Programbestuurder, Kobus Burger met ‘n Sentech ondersoekbeampte Jaap Lourens gevoer het oor algemene radiokwaliteit, watter faktore uitsendings beïnvloed, hoe jy aanpassings kan maak om sake te verbeter. Luister só na RSG as die senders probleme gee.
Baie dankie vir jou ondersteuning.
Tot volgende keer,
Louise en die RSG-span