Beste [FNAME]
Ons Rugbyraaikompetisie is saam met ons regstreekse rugbykommentaar soos ‘n energiedrankie vir ons luisteraars, al lyk die Springbokke soms tam. Ons het net meer as 92,120 SMS inskrywings ontvang oor die 2 week-lange kompetisie, wat in samewerking met attooh! aangebied word om R20,000 kontant as totale prysgeld aan twee gelukkige wenners te besorg. Geluk aan André Steytler en Hennie Schmidt. Dankie aan elkeen wat deelgeneem het aan die kompetisie.
RSG se jaarlikse Radiodramaskryfkompetisie het onlangs gesluit en ons is nuuskierig om te sien wie die beoordelaars gaan aanwys as die uiteindelike wenners. Daar was 111 inskrywings. Aangesien die beoordeling anoniem geskied en absoluut op meriete beoordeel word, sien ons elke jaar met groot afwagting uit na die talent wat ontgin word deur hierdie kompetisie. Die wenners word op 2 Desember bekend gemaak.
Ons is in die pylvak met die dokumentêre seisoen en te oordeel aan die weeklikse SMS-terugvoer na die ateljee, geniet luisteraars die aanbiedinge op Donderdagaande om agtuur. Skakel in vir die volgende paar weke en stuur ook jou terugvoer per SMS na 45889 wanneer die omroeper die groen lig daarvoor gee. Ons waardeer luisteraars se terugvoer en deel dit met die programmakers. Dit stel hulle in staat om deurlopend gehalte programme te lewer.
Onthou dat RSG en Beeld Kinderfonds se projek om kinders in nood te ondersteun, steeds aan die gang is. Besoek hul Facebookblad vir meer besonderhede. Ons het nie net vroue in Augustus gevier nie, maar ook lewens gevier deur die Stigting vir Orgaanskenkers te ondersteun. Jy kan steeds registreer as ‘n orgaanskenker, besoek bloot www.odf.org.za vir meer inligting.
Volg RSG op Twitter by @zarsg vir kort brokkies of besoek die webtuiste by rsg.co.za vir meer besonderhede.
Tot volgende keer,
Louise en die RSG-span