Beste [FNAME]
En so is nog ’n maand op sy rug! Die veelbesproke plaaslike verkiesings is amptelik verby, en nou is die volgende besprekingspunt sekerlik wat gesinne en geliefdes vir Kersfees beplan. Voordat die spyskaart en aktiwiteite gefinaliseer kan word, is daar egter nog heelwat werk wat voorlê.
Agter die skerms by RSG is ons hard besig met die voorbereiding van ’n besonderse Kersdagprogram om op Saterdag 25 Desember reg deur die dag luistergenot te verskaf. Meer besonderhede hieroor is in die volgende nuusbrief met ’n gedetaileerde program vir die dag.
Desember is ook gewoonlik ’n tyd waar ons omroepers wat reg deur die jaar soveel ure bestee om vir elke luisteraar dag en nag ingelig te hou en te vermaak, ’n blaaskans neem, en sommige programme ook ’n ruskans neem vir sowat twee weke. Gedurende hierdie tyd bring ons weer die hoogtepunte en juwele van die jaar vir jou. Diegene wat dit misgeloop het, kry dan die geleentheid om die spesiale programme en insetsels te geniet. Die spesiale vakansieprogramme gaan voorwaar ’n geskenk aan luisteraars wees!
Die afgelope paar maande het vele uitdagings vir die SAUK en RSG gehad, maar in dié tyd het ons darem van drie vaste personeellede ná die afleggings einde Maart, gevorder tot agt vaste personeellede. Ons kon elke dag uitsaai, behalwe vir die paar onderbrekings nou en dan. Hopelik help Sentech se instandhoudingswerk dat almal landwyd steeds na hul gunsteling stasie kan luister.
RSG voldoen elke maand aan die lisensievoorwaardes en mandaatlewering met goeie programme en musiek, en bowenal het ons die beste luisteraars wat lojaal en ondersteunend is! Ons wil ook dankie sê aan elke adverteerder, kliënt en vennoot wat die pad saam met ons stap – ons waardeer julle bydraes.
Geniet hierdie voorlaaste uitgawe vir 2021 met ’n blik op Nic se goed en ons neem jou ook tot in die drama-ateljees. Indien jy nog nie vir een van die Oppiwaters van 2022 bespreek het nie, kyk gerus na die gewilde bootrit wat net vir jou wag om die anker te lig.
Groete,
Louise en die RSG-span
