Beste [FNAME]
Veels geluk liewe RSG omdat jy verjaar! Vandag, 27 Oktober, is amptelik die stasie se verjaardag! Ons het soveel positiewe terugvoer ontvang oor die spesiale programme wat die verhaal van meer as agt dekades vertel het – nostalgiese reise, danksy die skatte uit die argief.
Nou is Afrikaanse radio op die drumpel van ‘n nuwe era met die U Eie Keuse-konsert wat hierdie Saterdag regstreeks voor ‘n gehoor in die SAUK se hoofgebou in Aucklandpark uitgesaai word! Ons sien daarna uit om voort te bou op die grondslag wat die afgelope 85 jaar gelê is.
Die tweede dramaseisoen vir die jaar het reeds afgeskop, en daar beslis vermaak uit die boonste rakke – skakel dus gerus elke Donderdagaand om agtuur in. Onthou dat die Radioteater ook op potgooi beskikbaar is indien jy nie regstreeks of na die deurnagherhaling kon luister nie.
Dit was beduidend hoe mense gesmag het na vertonings en aanbiedings ná sowat twee jaar van Covid wat soveel inperkinge meegebring het. Almal is egter nie in ‘n posisie om konserte by te woon nie, en daarom bied RSG weereens ‘n keur van klassieke musiek op Sondagoggende 10-uur aan met die ‘Klassieke Konsertbederf’.
Die goeie nuus is dat ‘n daar ook ‘n Kersdag- en ‘n Oujaarsaandkonsert uitgesaai sal word met die Gautengse Filharmoniese Orkes en soliste. Intussen is die span programmakers ook hard besig met voorbereidings vir ‘n spesiale Kersdagprogram.
RSG se mense is talentvol – daarvan getuig die gereelde toekennings en benoemings. Baie geluk aan Martelize Brink wat onlangs deur die ATKV met ‘n Oorkonde-toekenning vereer is. Oor ‘n paar weke word die jaarlikse Radio Awards aangekondig en met vyf benoemings word RSG ook daar trots verteenwoordig.
Baie dankie vir jou volgehoue ondersteuning van RSG – jy liewe luisteraar vorm deel van die slagaar van die stasie. Volg ons gerus op Instagram (@rsg_100104fm) of Twitter (@zarsg) en besoek ons webtuiste by rsg.co.za om ingelig te bly oor die jongste nuus, programme en gebeure.
Tot volgende keer,
Louise en die RSG-span
