Beste [FNAME]
Winter 2021 het behoorlik in Johannesburg, en sekerlik die res van die land neergesak hierdie week! Tesame met die beurtkrag moes ons maar spartel en spook om alles gedoen te kry. Ja, ‘n mens besef nie hoe afhanklik jy van iets is, totdat dit nie meer daar is nie!
Die Winterhoop projek wat RSG ondersteun saam met MES, PEN en hul vennote het amptelik op 1 Junie afgeskop en ek wil elke luisteraar aanmoedig om dit vir die maand van Junie te ondersteun. Indien jy ook net self in jou eie omgewing betrokke wil raak en ’n hand uitreik in hierdie koue maand na mense – en diere – in nood, doen dit gerus op jou eie manier.
Ons is baie opgewonde om vanjaar vir die vyf-en-twintigste keer die Sanlam/RSG Radiodramaskryfkompetisie aan te bied – en is dankbaar vir Sanlam se voortgesette ondersteuning van hierdie belangrike projek om die uitbreiding van radiodramas en aansporing van nuwe talent te bevorder. Met ’n allermintige R115,000 totale prysgeld, is dit nou jou kans om in te skryf voor die kompetisie op 16 Augustus sluit. Kry gerus die handleiding en skryfwenke op rsg.co.za of stuur ’n epos na [email protected] vir meer inligting en inskrywings. Luister ook gerus na die laaste paar Radioteaters op Donderdagaande om 20:00 van hierdie seisoen wat op 24 Junie klaarmaak.
RSG is ook opgewonde om “Die Dag van Môre” – ’n sepie wat die nood en vreugde van ons lewens aanspreek, in samewerking met Foxwood bekend te stel.
Bly veilig en bly warm!
Groete,
Louise en die RSG-span
