Beste [FNAME]
Ons is nou reeds ’n week of wat in die nuwe finansiële jaar wat ook ’n paar nuwe programme en stemme gebring het. Dit was ’n geswoeg en gesweet om seker te maak al die beplanning, aanpassings, administrasie en kontrakte is betyds gereed om daagliks vir jou as luisteraar ‘n verskeidenheid van programme en musiekaanbiedings te verseker.
Programveranderinge aan die begin van ’n nuwe geldjaar is ’n normale verskynsel in die radiolandskap. As deel van RSG se mandaat as openbarediensuitsaaier, word ’n wye verskeidenheid programme deur die loop van die dag geskeduleer om in verskeie behoeftes en smake te voorsien – programme wat inlig, opvoed en vermaak.
Verskeie faktore beïnvloed strategiese besluite, waar voortdurende evaluering en hernuwing ten doel het om stagnering te voorkom en nuwe geleenthede te skep om gehore te laat groei en die lewensvatbaarheid van ’n organisasie te verseker. Tendense in radio en verbruikerspatrone in ’n veranderde medialandskap, en die relevansie van mededingende, moderne en oorvloedige keuses het bygedra tot die aanpassing van programme op RSG.
Luisteraarsterugvoer op verskeie programme die afgelope paar jaar, navorsingsinligting, vooruitskatting deur gerekende bedryfsinstansies en interne strategiese besluite het die weg gebaan vir verandering.
Die nuwe programaanbiedinge, veral die nuwe ontbytprogram ‘Op en Wakker’ bied geleenthede aan RSG om op gelyke voet met soortgelyke handelsmerke mee te ding. Dit bied ook meer luisteraarinteraksie van ’n jonger gehoor en bied meer geleenthede vir adverteerders se deelname.
RSG voldoen steeds aan lisensievoorwaardes en mandaatvereistes, terwyl nuwe geleenthede geskep word vir die finansiële volhoubaarheid van die handelsmerk.
Met meer as 1,4 miljoen diverse luisteraars reg oor die land, en met die viering van 85 jaar van Afrikaanse radio vanjaar, neem RSG die luisteraars saam op ’n reis om ’n volhoubare toekoms vir RSG te bou.
Die bedryfshoof van die SAUK, Ian Plaatjies, en die hoofbestuurder by SAUK Radio, Johan van Rooyen, gee ook meer inligting oor die plek van RSG in die moderne wêreld, en die redes vir die programveranderings soos Op en Wakker.
Ek deel ook graag goeie nuus! Kobus Burger, RSG se senior mandaatregisseur het weer daarin geslaag om borgskappe vas te knoop vir sowel die Radiodramaskryfkompetisie (vanjaar vir die 26ste jaar aangebied) as die Kwartkomediekompetisie wat laasjaar bekend gestel is. Dus kan beide hierdie kompetisies weer in 2022 aangebied word met prysgeld vir die wenners. Daarmee word nuwe talent ontgin, die skryf- en kunstewêreld ondersteun, en innoverende inhoud vir RSG geskep!
Onlangs het iemand gesê ten spyte van al die uitdagings die afgelope jaar moet ek gaan sit en ‘n lysie maak van die dinge wat wel goed gegaan het. Ons is geneig om partykeer net in die negatiewe dinge vas te staar, en vergeet dan van dit wat ons wel bereik het, die verskil wat ons wel gemaak het, die goeie dinge wat wel gebeur het. Ek daag jou uit om dieselfde te doen – dit beteken nie jy druk jou kop soos ’n volstruis in die grond nie, maar jy laat nie toe dat die negatiwiteit jou oorweldig nie, en jy het dan durf om die pad vorentoe aan te pak!
Groete tot volgende keer.
Louise en die RSG-span
