Beste [FNAME]
Ons is besig om so paar dinge meer vaartbelyn te maak en dus word senderprobleme direk by Sentech se tegniese span aangemeld. Die klagtes word daaglikse opgevolg deur die SAUK se tegniese afdeling. Luisteraars in die Kleinmond-omgewing is egter steeds sonder RSG opvangs aangesien die proses om ’n nuwe sender op te rig nie oornag gebeur nie. Vodacom het toestemming verleen dat die nuwe sender op hul terrein gebou mag word en nuwe toerusting is bestel.
Die volgende stap is vir die SAUK om aansoek by OKOSA (Onafhanklike Uisaai Owerheid van Suid-Afrika) te doen vir toestemming om die sender na ’n nuwe ligging te verskuif.
Intussen kan luisteraars na RSG luister via DSTV oudiokanaal 813 of OpenView oudiokanaal 615, die SAUK se mobiele nuustoepassing of aanlyn stroom via rsg.co.za
Een van die dae vier Suid-Afrikaners Moedersdag. Skakel gerus in op ‘Alhoebekker’ vroeg in Mei om te hoor hoe jy vir iemand spesiaal in jou lewe ’n spesiale boodskap kan stuur om daardie ekstra waardering te betoon! Ek is baie bevoorreg om nog my ma in my lewe te hê, en sommer naby ook – sy bly in ’n woonstel op my erf en dis heerlik om nou en dan net in te loer en te gesels. Om self ’n ma van twee groot seuns te wees, bring ook vir my baie plesier. Koester die spesiale mense in jou lewe!
RSG gaan binnekort by die Royal Skou in Pietermaritzburg kuier, so ons nooi alle luisteraars in KwaZulu-Natal om op Sondag 5 Junie by die RSG verhoog bymekaar te kom en die spesiale konsert te geniet. Die gasheer is Derrich Gardner.
Ten slotte – aan almal wat e-posse en sms’e stuur, dankie vir jul terugvoer en insette. Ongelukkig is dit nie moontlik om elkeen te antwoord nie, maar ons waardeer jul menings en neem dit ter harte.
Groete tot volgende keer.
Louise en die RSG-span
